સુખની સમજણ

 

સુખની સમજણ

પ્રભુ !

અમારો યુગ તો મોડર્ન ટેક્નોલોજીનો છે.

IIT, IIM ને AIIMS માં મસ્તિષ્કની માવજત થાય છે,

પણ હૃદયની અવગણના થતી જોવા મળે છે.

Vivo, Oppo, Poco, Moto ભાતભાતનાં ઉપકરણ,  

અને તેના સ્ક્રીન પર આંગળીઓનું વશીકરણ.

ધીમે ધીમે હારી રહેલું અંતઃકરણ,

ને જીતની બાજી મારી જતું નફરતનું રાજકારણ.

ઘસઘસાટ ઊંઘ આવતી નથી,

ને ચિંતા પલંગના નક્શીકામની રહે છે.

કુદરતી હાજત થતી નથી,

પણ ફિકર ઈંગ્લીશ ટોયલેટમાં ટાઈલ્સની છે

ડાયનિંગ ટેબલ ભરેલું છે,

પણ ડોક્ટરની સૂચના તે ખાવાની ના પાડે છે.

ઓફિસ જવા માટે કાર છે,

પણ ઘરે આવી સાયકલ ચલાવી ફેટ ઘટાડાય છે.

અમારી સુખની શોધ ચાલુ છે,

પણ સુખની સમજણ ક્ષીણ થતી જાય છે.

શું કરીએ પ્રભુ ?

સગવડ તો વધે છે, પણ સુખ વધતું નથી.

(પંકજદાંડી)