હેપ્પી બર્થ ડે સખા

 

 હેપ્પી બર્થ ડે સખા

હેલો ડિયર !

હું તને સમજવાનો પ્રયત્ન કરું છું, પણ દરેક વેળા ગોથું ખાઉં છું.

તેં વાંસળી વગાડી, સાથે રાધાને રમાડી,

લલીતાને લલચાવી, પણ ગોપીઓને ઘુમાવી

મીરાંને નચાવી, સુભદ્રાને ભગાવી

આઠ પટરાણી પછી પણ સોળસો ને સ્વીકારી

ગોવાળિયાને રમાડી ને ગાયોને ચરાવી

 દડાને ડુબાડયો ને નાગને ભગાડયો

શીકું ફોડયું, માખણ ખાધું, મોરપીંછનો મુગટ ધર્યો

ગોપીના ચીર હર્યાં, દ્રૌપદીના ચીર પૂર્યાં

કંસ ને માર્યો, અસુરોને માર્યા, પણ કૌરવોને મરાવ્યા

ગોવર્ધન ઉઠાવ્યો ને ગોવર્ધનધારી થયો

નરસિંહનું મામેરું કર્યું, વિદુરજીની ભાજી આરોગી

વિપરીત પરિસ્થિતિમાં પણ તારું હાસ્ય કાયમ રહ્યું

કર્મના સિદ્ધાંતની સાથે નિષ્કામ કર્મનો અદભુત સંદેશો આપ્યો

યુધ્ધના મેદાનમાં ગીતાનું જ્ઞાન આપ્યું.

રણ છોડીને ભાગ્યો ને રણછોડ કહેવાયો

ને અંતે પૂર્ણપુરુષોત્તમ પણ કહેવાયો.

પણ પંકજને તું હજુ ય ન સમજાયો.

આથી જ આજની શ્રાવણ વદ આઠમની મધરાતની પળ

પંકજનો  પ્રેમ સભર ‘હેપ્પી બર્થ ડે’ સ્વીકાર કર !

(પંકજદાંડી)