અંગદાનની લાઈન કેમ નથી

પ્રભુ, 

અમે મનુષ્યલોકના પ્રાણીઓ

મૃત્યુદેવથી આટલા બધા ડરીએ છીએ શા માટે ?

એવું કેમ શક્ય નથી,

અમે મૃત્યુદેવની પણ પૂજા કરીએ ?

એમને વેલકમ શા માટે નથી કહી શકતા ?

જો મૃત્યુદેવ તારા જ સંદેશ પ્રમાણે વર્તાતો હોય

તો પછી એનું આવવું અશુભ શા માટે ?

પણ એ અમને લઇ જાય પછી

અહીં રહી જાય છે આત્મા વિનાનું ઉજ્જડ ઘર.

આ ઉજ્જડતાને સજીવન કરે છે અંગદાન.

જો કે અમારો મર્યા પછી પણ મોહભંગ થતો નથી.

આથી જ અંગદાન બાબતે નિષ્ક્રિયતા જોવા મળે છે.

જોયું હતું ‘નોટો’ બદલાવવા તો ખુબ લાઈનો થઈ,

તો પછી અંગદાન ના દાતાઓની લાઈન કેમ નથી ???

(પંકજદાંડી)

તું હોવાનું પ્રુફ

પ્રભુ !

જમાનો બદલાતો જાય છે,

તારી હાજરીનો અણસાર કોઈનેય આવતો નથી.

જયાં ને ત્યાં proof માંગવામાં આવે છે.

જન્મ્યા હોવાનું proof, જીવતા હોવાનું proof,

ભણ્યા હોવાનું proof, મર્યા હોવાનું proof,

હદ થઇ જાય છે સર્જીકલ સ્ટ્રાઇકનું પણ proof માંગવામાં આવે છે.

કોઈ તું હોવાનું proof માંગે છે.

હું પ્રયત્ન કરી રહ્યો છું તે શોધવાનો.

હું શોધતો શોધતો તારે દ્વારે આવું,

ડોરબેલ વગાડું,તો પ્રભુ,

‘હુ ઇઝ ધીસ’ પૂછવાને બદલે ડોર ઓપન કરજે.

મારે જોવો છે તને, તું કેવો દેખાય છે?

મારે કરવી છે તારી હયાતીની ખરાઈ.

અને એક સેલ્ફી તો બનતી હૈ....

(પંકજદાંડી)

ગુર્જરી માતા

જન જન ની તું પાલક છે મા, અમ ગુર્જરી માતા.

સોરઠ, કચ્છ, વાગડ, ભાલ, મેહાણા, ચરોતર, સુરત.

ગિરનાર, પાવાગઢ, તાપી, નર્મદા, સાગર અરબ તરંગ.

દાંડી દ્વારિકા આગે, ગાંધી ક્રિષ્ણ જાગે,

સૌના વિકાસ સાથે.

કલ્યાણકારક, મંગલદાયક જય હો અમ ગુર્જરી માતા.

જય હો, જય હો, જય હો, જય જય જય જય હો.

(પંકજદાંડી)

કદાચ આપણે મળીએ પણ ખરા.

પ્રભુ !

હમણાં થોડા સમયથી હું કઈંક નવું કરી રહ્યો છું.

મારે તને મળવું છે અને તે પણ કવિતાના માધ્યમથી.

આજ પર્યન્ત મમ્મી-ડેડી, ભાઈ-બહેન, ટીચરો- પ્રોફેસરો,

પત્ની-બાળકો, દોસ્તો-દુશ્મનો પાસેથી શીખતો રહ્યો.

યાહૂ અને ગૂગલે પણ મને મોડર્ન રીતે મને શીખવ્યું.

પણ તને કેમ મળવું તે ક્યારેય સ્પષ્ટ થયું નહીં.

હવે  તો હું સિનિયર સીટીઝન થઇ ગયો છું.

ત્યારે મારાં ગીતો મને મદદ કરી રહ્યાં છે

કદાચ આપણે મળીએ પણ ખરા.

(પંકજદાંડી)

લાઈફની રેન્જ

મારા વડીલ, સિનિયર સીટીઝન મિત્રો ઇન્ડિયામાં વિન્ટર ગાળીને પરત થઇ રહ્યા છે ત્યારે તેમનું સ્વાગત કરતી હળવી શૈલીની રમુજી રચના ....દિલ પે મત લેના યારો..

લાઈફની રેન્જ

ભાઈને માથે ટાલ છે ને ફરતે થોડા બાલ છે.

ટેનશન ફ્રી કાલ છે ને પેનશન હજારીલાલ છે.

ભાઈ તો મોન્ટ્રિયાલ છે.

ઇન્ડિયામાં પ્રોપર્ટી છે ને સાથે ફોર વ્હીલ ગાડી છે.

બંગલા પાછળ વાડી છે ને તેમાં કલમ ઉગાડી છે.

ભાઈને જેરામની યાદ આવી છે.

એમના દીકરા દીકરી સેટ છે, પણ વહુ ને જમાઈ ગ્રેટ છે.

ગ્રાન્ડ ચિલ્ડ્રન ફ્રેન્ચ છે, એમાં નથી હવે કોઈ ચેન્જ છે.

ભાઈની લાઈફની આજ રેન્જ છે.

(પંકજદાંડી)

(જેરામભાઈની ઘરબેઠાં નવસારીથી મોન્ટ્રિઅલ કેરી પાર્સલ યોજના)

(મોન્ટ્રિયાલ - મોન્ટ્રિઅલના રહેવાસી,  હજારીલાલ - હજાર પ્લસ)

પાકું બોર

બોર તો પાકું હતું પણ પથરો મારવાની હિમ્મત નો'તી.

બોરડી ય નીચી હતી પણ અડવાની ઔકાત નો'તી.

મિત્ર પ્રકાશનો સાથ માગ્યો પણ તેણે જ અંધકાર ફેલાવ્યો.

ઘરમાં પપ્પા અને મમ્મીએ જોરદાર વિરોધ નોંધાવ્યો.

કવિતા લખવી શરુ કરી એ  ‘હાફ ગર્લફ્રેન્ડ’ ની જ્યારથી,

હદ થઇ ગઈ એણેય ડીલીટ કર્યો  ફ્રેન્ડ લિસ્ટમાં ત્યારથી.

(પંકજદાંડી)

હું ને પરિમલ

હું ને પરિમલ

[મારા મામાનું ઘર પણ દાંડીમાં જ અને માત્ર પાંચ મિનિટના વોકિંગ ડિસ્ટન્સ પર. આજથી પચાસ વર્ષ પહેલાંની લગભગ સને ૧૯૬૭-૬૮-૬૯ ની અમારી બાળપણની સ્ટોરી. જો કે આજે મામા નથી, મામાનું ઘર ઇતિહાસમાં સમાય ગયું છે અને ત્યાંની ભૂગોળ સંપૂર્ણપણે બદલાય ગઈ છે.]

હું ને પરિમલ છાનામાના મામાને ઘેર ભાગ્યા,

ચોપડાં દફતર ફેંકી દઈને ક્રિકેટ રમવા લાગ્યા.

મીઠી મમાયનો ધોકો ચોરી બનાવ્યું એનું બેટ,

અબ્બાસભાઈનું બોક્ષ ફાડી બાંધ્યું તેનું પેડ.

ખીસામાંથી કાઢ્યો પરીએ નાનો રબરનો બોલ

ઠીકરાં ઉપર થૂંક નાખી ઉછાળ્યો અમે ટોસ.

પહેલા બોલે હું બોલ્ડ થયો ને આવ્યો પરીનો દાવ,

ડોશીમા ને બોલ વાગ્યો તો “મરીગ્યા નાસી જાવ”

સાડા પાંચની બસ આવી ને ઉતર્યા એમાંથી પપ્પા,

પરિમલનો કાન આમળ્યો ને મને લગાવ્યા ધબ્બા.

(પંકજદાંડી)